كانت شورة طين شورة الدورات ال9شهور ( مدة حمل ) منحة وزارة الاتصالات – عن تجربة واقعية من فصل تصميم المواقع (web development)

أولاً افترض وزير الاتصالات فى تصريح له على موقع الوزارة بخصوص هذه المنحة أنها للصفوة من الخريجين !!!! ( اللى يعرف مين صفوة دى يقوللى ) وإحنا لا صفوة ولا حاجة فالغالبية العظمى منا لا يحمل أى دورات كمبيوتر و مؤخرا أنهى البعض دورة icdl  التى لا تضيف الكثير كما أن اغلب المؤهلات لا تمت بصلة للكمبيوتر مثل الآداب و التربية والتجارة هذا لان الوزارة لا تعترف بشىء اسمه الحظ و النصيب .

و تبدأ الدورات بتعامل فى منتهى الدناءة مع الشباب من بداية الإقرار أبو 15 ألف جنيه يمضى عليهم المتدرب ضمان للوزارة التى تدعى أنها تكلف المتدرب 45000 جنيه !! على أساس انها بتفتح مركز مخصوص لكل متدرب  ! ما علينا  - ثانيا ً كل شىء وله ثمن و التعامل بالفلوس علشان تتعود على انك تكون كلب فلوس من بداية حياتك فيوم الغياب يتحسب ب 20 جنيه

الأهم هو اليوم الدراسى 6 ساعات كاملة و الفاصل  ساعة  فى نص اليوم وكل فينة و الاخرى !!!! فينة ايه انا بدأت أخرف يعنى كل حين وآخر يوفد علينا زائر من الوزارة يسألنا عن المشاكل و العقبات فى الدورة كالعادة الكل بيسأل عن الشهادة اللى بتتاخر وعن الشغل بعد انتهاء الدورة– المهم تحس طبعا ان الوزارة يهمها فى المقام الاول خط سير الدورات وطبعا الفشخرة بنجاح المشروع و الفكرة حبذا لو الرعاة الرسميين للدورة أجانب يعنى الطلبة دول وسيلة مش أكتر لاستمرارية المشروع و البزنس المترتب عليها .

نتكلم عن المرتب الشهرى اللى لسه ما اخدناهوش لدلوقت برضه لان الوزارة مش ضامنه جدية الطلبة أحسن حد ينسحب وللا حاجة و على فكرة الانسحاب مسموح لحد اول شهر المهم وعدونا بصرف المبلغ مجمع بعد أول 3 شهور من التدريب مع اننا خلصنا الرابع ولسه مانعرفش كام عموما هو هيكون اقل بكثير من مرتب اى فراش فى وزارة الاتصالات .

فى البداية يمكن 400أو أقل يا تصدق يا متصدقش 7 دول مانحة تصرف مبلغ زهيد زى ده يللا مش مسامحين.

فى النهاية الوزارة بتعمل كل حاجة تضمن بيها حقها و مصلحتها ومش مقدرة ان الطالب بيضحى برضه وفى ناس مننا سابت شغلها الخاص و المؤقت علشان الدورة دى وفى منح وحاجات بتنزل فى اماكن ثانية وبتضيع مننا يعنى السبب الأول لدخولنا المنحة هو الفلوس – ناهيك عن حشو المقررات واستلام رزمة كتب كل شوية ربنا يعديها على خير.